Madaxweyne Biixi Oo Shaaciyay Wakhtiga Rasmi Ah Ee Ay Shirkadda DP World Bilaabayso Ballaadhinta Dekedda Berbera Iyo Dhismaha Jidka Isku Xidha Somaliland Iyo Itoobiya
Hargeisa (Dalmar-News):-Madaxweynaha Jamhuuriyadda Somaliland Md. Muuse Biixi Cabdi ayaa daboolka ka qaaday in Shirkadda DP World ay bilaabayso bisha January sannadka 2019ka ballaadhinta iyo casriyeynta marsadda Berbera iyo dhismaha jidka isku xidha Berbera iyo magaalada xuduuda ku taalla ee Wajaale.
Siday werisay wakaaladda wararka Somaliland ee SOLNA, Madaxweynuhu wuxuu sidaas ka sheegay khudbad uu ka jeediyey munaasibadii xalay loogu dabaal-degayey 58 guurada ka soo wareegtay xiligii ay Somaliland xornimadeeda ka qaadatay boqortooyadii Ingiriiska, 26kii June 1960kii.
Madaxweyne Muuse Biixi waxa uu sheegay in daraasadii lagu ballaadhin lahaa dekedda Berbera dhammaatay oo lagu jiro tartankii lagu bixin lahaa shirkadii dhisi fulin lahayd casriyeynta dekedda Berbera.
Madaxweynuhu waxa kaloo uu intaas ku daray in sidoo kale la hirgelin doono aagga suuqa xorta ah (Free Zone) oo laga furayo magaalada Berbera, waxaanu xusay in suuqaasi uu Somaliland u soo jiidi doono ganacsato badan.
Md. Muuse Biixi waxa uu shacbiga Somaliland u soo jeediyey inay soo dhaweeyaan ganacstada iyo shirkadaha Somaliland u imanaya maalgashiga.
Geesta kalena madaxweynuhu waxa uu hambalyeeyey dawladda iyo shacabka Jabuuti oo 27ka June ay ku beegan tahay xiligii ay xornimadooda ka qaateen dalka Faransiiska oo xukumi jiray.
Madaxweyne Biixi wuxuu soo dhaweeyey isbeddelka uu sameeyey Ra’iisul-wasaaraha Itoobiya Abiy Ahmed, waxaanu tilmaamay inuu heshiisyo ganacsi la galay dalalka geeska Afrika oo dhan.
Madaxweynaha Somaliland wuxuu mar kale cambaareeyey bam gacmeedkii lagu weeraray isu soo bixii lagu taageerayey Ra’iisul-wasaaraha Itoobiya, waxaanu ku sifeeyey weerar argagixiso.
Xafiiska Shabakada Dalmarnews.com
Hargeisa/Somaliland
Dalmarnews@gmail.com