Haddii uu doorashada ka baxo Biden yaa beddeli doona?
Madaxwaynaha Maraykanka Joe Biden ayaa dooddiisii liidatay ee telefishinka laga sii daayay todobaadkii hore waxa ay ka nixisay xisbiga Dimuqraadiga waxaana ay dhalisay dood ku saabsan cidda ku tartami karta booskiisa haddii uu ka tanaasulo.
Inkasta oo isbeddelka noocaas ah aan hadda la fileyn, haddana waxa uu abuuri doonaa dagaal fool xun ka dhex dhaca xisbiga Dimuqraadiga bilo ka hor codbixinta.
Dimuqraadiyiinta ayaa muujiyay cabsida iyo shakiga laga qabo musharaxnimada Biden, taasoo dhalisay dood badan oo ku saabsan in 81-jirka uu yahay qofka saxda ah ee la tartami kara Trump bisha November.
Haddaba waxaa jira siyaabo badan oo lagu bedeli karo Biden gudaha xisbiga, laakiin bilo kaliya ayaa ka haray codbixinta, fursadaha uu Biden ku bixin karo waa kuwo aad u yar.
Laakiin haddii ay dhacdo, waxaa jira dhowr musharrax oo suurtagal ah inay buuxiyaan doorkiisa.
Madaxweyne ku xigeenka hadda Kamala Harris, waxa ay dhalatay 1964-tii
Madaxweyne ku xigeenka Kamala Harris, oo hore ugu jirtay xulka, waa door muhiim ah oo muuqda.
Madaxweyne ku xigeen ahaan, waxay noqotay wajiga maamulka Biden ee dhaqdhaqaaqa Roe v. Wade.
Harris, oo caddeysay inay tahay saaxiib daacad u ah Biden, ayaa si adag u difaacday waxqabadkiisa dooddii ugu horreysay, iyadoo qiratay ka dib in madaxwaynuhu uu “ku bilowdey qaab deggenaan ah” laakin waxa ay ku ammaantay Biden inuu bixiyay jawaabo la taaban karo oo ka badan Trump.
“Waxaad ka doodi kartaa qodobada, laakin ugu dambeyntii waxa cidda madaxweynaha noqoneysa go’aaminaya doorashada,” ayay u sheegtay CNN Khamiistii.
Madaxweyne ku-xigeen ahaan, Kamala Harris waa la yaqaan, laakiin waxa ay dhibsatay qiimaynteeda hoose ee oggolaanshaha muddada xilkeeda.
Marka loo eego xogta laga helay website-ka codbixinta ee FiveThirtyEight (538), Harris celceliska oggolaanshaha ra’yi ururinta waa 39% kaliya, laakiin 49% dadka Maraykanku ma taageeraan iyada.
Waqtigeeda muhiimka ah ee ka hor tartanka suurtogalka ah ee madaxweynenimada ayaa iman doona marka bahwadaagta BBC-da iyo CBS ay qaban doonaan dood madaxweyne ku-xigeenka hor Shirweynaha Qaran ee Dimuqraadiga ee Agoosto.
Gretchen Whitmer, Guddoomiyaha Michigan, waxa ay dhalatay 1971
Gretchen Whitmer, oo laba jeer xilka qabatay, ayaa sumcad ku dhex leh xisbiga Dimuqraadiga Midwestern, kuwaas oo saadaaliyay inay u tartami doonto madaxtinimada 2028-ka.
Waxay mar ka qayb qaadatay ololihii Biden, mana aysan qarin hankeeda siyaasadeed.
Waxay u sheegtay The New York Times inay jeclaan lahayd inay aragto madaxweynaha xisbigeeda sanadka 2028, laakiin may soo jeedin inay noqon doonto qofkaas.
Guddoomiyaha California Gavin Newsom (wuxuu dhashay 1967)
Gavin Newsom waa mid ka mid ah afhayeennada ugu adag ee maamulka Biden. Wuxuu inta badan ka soo muuqdaa wararka iyo faallooyinka isaga oo amaanaya Biden.
Laakiin Newsom waxa uu leeyahay tixgalin siyaasadeed oo u gaar ah.
Waxa had iyo jeer lagu tiriyaa inuu yahay musharraxa doorashada 2028, laakiin hoggaamiyeyaal badan oo dimuqaraadi ah ayaa durba u arka inuu yahay beddel xooggan oo Biden ah.
Xoghayaha Gaadiidka Pete Buttigieg (wuxuu dhashay 1982)
Hamiga Pete Buttigieg ee ah in uu u tartamo madaxweyne ma aha mid qarsoon.
Waxa uu ku tartamay ololihii madaxtinimada ee 2020 waxaana lagu tiriyaa inuu yahay xiriiriyaha ugu fiican ee maamulka Biden.
Waxa uu wax ka qabtay tiro xasarado dadweyne ah intii uu ahaa Xoghayaha Gaadiidka, oo ay ku jiraan khadka tareenka Bariga Falastiin ee Ohio, buundada Baltimore oo burburtay, iyo dhibaatadii duulimaadka ee Koonfur-galbeed ee 2022
