Masar oo xaqiijisay in ay qayb ka tahay howlgalka cusub ee AUSSOM
Jamhuuriyadda Carbeed ee Masar ayaa sheegtay in ay qayb ka tahay howlgalka cusub ee AUSSOM oo lagu baddelayo kan ATMIS ee sida tooska ah u billaabanaya marka la gaaro Bisha Janaayo sanadka soo socda 2025.
Wasiirka Arrimaha Dibadda Masar, Badri Cabdilcaadi oo la hadlay Warbaahinta kaddib markii uu la kulmay dhiggiisa Soomaaliya Axmed Macallin Fiqi ayaa sheegay in Dowladdiisa ay qayb ka tahay howlgalka AUSSOM.
Badri ayaa tilmaamay in Dowladdiisa waajib ka saaran yahay garab istaagga Soomaaliya sidaas awgeed Jamhuuriyadda Carbeed ee Masar diyaar u tahay kamid noqoshada howlgalka lagu xoojinayo nabadda & kala dambeynta.
“Masar waxa ay qayb ka tahay oo Dowladda Soomaaliya ka codsatay howlgalka cusub ee Midowga Afrika iyo Qaramada Midoobay taageerayaan si loo xoojiyo nabadgalyada” Sidaasi waxaa yiri Wasiirka Arrimaha Dibadda Masar, Badri Cabdilcaadi.
Maalmihii lasoo dhaafay waxaa aad loo hadal hayay in Dowladda Federaalka Soomaaliya ay dib uga laabatay go’aankeedii ahaa in howlgalka AUSSOM laga saaro Itoobiya oo baddelkooda lasoo geliyo Masar & Eretareeya kaddib heshiiskii ka dhacay Turkiga.