Maxkamadda Ciidamada Oo Saaka Oo Dil Toogasho Ah Ku Fulisay Saddex Nin
Maxkamadda Ciidamada Qalabka Sida ayaa saaka oo Isniin ah xukun dil toogasho ah ku fulisay saddex Nin oo horey Maxkamadda xukuno dil ah ugu ridday, kuwaasi oo kamid ahaa dagaalamayaasha Al-shabaab.
Saddexda nin ee dilka toogashada ahaa lagu fuliyey ayaa lagu kala magacaabi jiray Nuur Wayne, Xasan Boy & Keerow, waxaana Maxkamadda sheegtay inay qaraxyo ku dileen dad shacab ah iyo mas’uuliyiin, iyagoona illaa 2019 ahaa xukun fulin sugayaal.
Saraakiil ka tirsan Maxkamadda Ciidamada Qalabka Sida ayaa goobjoog ka ahaa goobta xukunka dilka ka dhacaayay oo aheyd fagaaraha Iskuul Buluusiya oo ku yaalla degmada Xamar-jajab ee Gobolkaan Banaadir.
Maxkamadda Ciidamada ayaa todobaadkii hore xukuno dil toogasho ah ku fulisay illaa 5 Nin oo uu ku jiray Askarigii dilay Wasiirkii howlaha guud Cabaas Siraaji, halka kuwo kalena ay ahaayeen xubno ka tirsanaa Al-shabaab iyo Daacish.