Xiisad Maalintii Labaad Ka Taagan Magaalada Laascaanood Iyo Casbi Jirta
Wararka Idaacadda Dalsan ee Muqdisho ay ka heleyso Magaalada Laascaanood ee Xarunta Gobolka Sool ayaa sheegaya in halkaas maalintii labaad ay ka taagan tahay xiisad u dhexeeysa dadka deegaanka iyo Ciidanka Booliska Somaliland.
Xiisadan ayaa ka dambeysay, kadib markii shalay Maleeshiyo hubeysan ay si xoog leh xabsiga Laascaanood ugala baxeen dad ku xirnaa oo lagu eedeeyay inay dad shacab ah ku dileen weerar ka dhacay Koonfurta Magaaladaas.
Saakay ilaa iyo xalay ayaa waxaa gudaha Magaalada laga maqlayaa dhawaqa rasaas oo ay kor u ridayaan Ciidamo hubeysan una abaabulan qaab qabiil, isla markaana meelaha qaarkood dadka u diidaya inay maraan.
Wararka ayaa intaas kusii daraya in Ciidamo ka tirsan kuwa Booliska Somaliland lagu daadiyay waddooyinka qaarkood ee Magaalada Laascaanood, kadib markii xalay xabsiga la dhigay Sarkaal ka tirsan Ciidanka oo kasoo jeeda Gobolka Sool.
Dadka deegaanka ayaa soo sheegaya in xaalad kacsanaan ah laga dareemayo gudaha Magaalada, isla markaana inta badan saakay ay xiran yihiin goobaha Ganacsiga, dadkuna ay yihiin kuwa aad u cabsanaya, maadaama mararka qaarkood la maqlayo rasaas.
Maleeshiyaadkii shalay xabsiga Magaalada Laascaanood kala baxay saddex ruux ayaa dadkaas la aaday dhinaca deegaanka kala-beyr ee dalka Itoobiya, waxaana la sheegayaa inay socdaan qorshe Ciidanka Somaliland ay dib xabsiga ugu soo celinayaa dadkaas.