Laascaanood oo caawa bandoow loo gelinayo Doorashada ka dhacaysa Berri
Magaalada Laascaanood xarunta Maamulka Waqooyi bari Soomaaliya waxaa caawa saq dhexe ka billaabanaya bandoow loogu talagalay in lagu xakameeyo amniga Magaaladaas oo berri ay ka dhacayso Doorashada Madaxweynaha iyo ku xigeenka Maamulkaas.
Guddiga Doorashooyinka maamulaya ayaa sheegay in Dadku ay haystaan fursado ay kusii iibsan karaan waxyaabaha lagama maarmaanka ah si aanay u dareemin culays saacadaha lagu howlan yahay Doorashada hoggaanka maamulka Waqooyi bari Soomaaliya.
Sidoo kale Guddiga ayaa mamnuucay in la rido rasaas, in ciidamo ka baxsan kuwa amniga ay gudaha hub lasoo galaan iyo wax weliba oo keeni kara is barbar yaac ama falal amniga liddi ku noqon kara sida lagu yiri warka kasoo baxay Guddiga.
Shan Musharrax ayaa u tartamaya Madaxweynaha maamulka Waqooyi bari halka ku xigeenka sidaas oo kale ay u loolami doonnaan 5 kale sida ku xusan warqadda uu soosaaray Guddiga diiwaangelinta iyo tartanka Doorashada Hoggaanka Maamulkaas.
Halkaan ka aqriso Magacyada Musharrixiinta
Maamulka Waqooyi bari ayaa muddo sharciyeedkiisa noqonaya 5 sano, waxaa dhowaan la doortay Guddoomiyaha Golaha Wakiillada iyo labadiisa Ku xigeen, halka Madaxweynaha & ku xigeenkiisa berri oo ah 30ka Agoosto 2025 lagu dooran doonno Magaalada Laascaanood.