Hogaanka Gobolk Tigrayga Oo Qaylo Dhaan U Dirsaday Midawga Africa
Hogaamiyaha gobolka Tigray ee waqooyiga Itoobiya ayaa ka codsaday midowga Afrika in ay soo fara galiyaan si loo joojiyo in dalku u dhaqaaqo dhankaa iyo dagaal sokeeye.
Hadal telefishanka laga sii daayay ayuu Debretsion Gebremichael ku sheegay in Tigray ay sii wadi doonto inay isdifaacdo ilaa dowladda federaalka ay ogolaato inay wadahadlaan.
Wararka naga soo gaaraya gobolka dariska la ah ee Amxaarada ayaa sheegaya in 100 askari oo katirsan ciidamada federaalka laga dawaynayo dhaawacyo. Mar sii horeysay, Mr Abiy isagoon wax sharaxaad ah ka bixin wuxuu shaqada ka ceriyay taliyihiisa ciidanka, madaxii sirdoonka iyo wasiirkii arrimaha dibada.
Taliyaha cusub ee ciidanka Berhanu Jula ayaa sheegay in ciidamada federaalku ay qabsadeen afar magaalo oo kuyaala galbeedka Tigray.
Xukuumadda Abiy ayaa ku eedaysay xoogaga gobolkaas ee u daacadda ah xisbiga TPLF ee talada gobolka hayey tan iyo horaantii sagaashamaadkii, in ay weerarro ku qaadeen saldhig milatari oo gobolkaa ku yaal iyo sidoo kale goobo ka tirsan gobolka la deriska ah ee Amhara.
Ra’iisul wasaaraha Itoobiya ayaa sheegay in howlgalka milateri ee laga bilaabay gobolka Tigray looga gol leeyahay in lagu soo af-jaro “isla xisaabtan la’aanta ka jirta gobalkaas”.