Al-Shabaab Oo La Wareegay Degaan Ku Dhow Magaalada Dhuusamareeb
Wararka aan ka heleyno deegaan ku dhow Magaalada Dhuusamareeb ee Xarunta Maamulka Galmudug ayaa waxaa ay sheegayan in halkaas ay la wareegeen dagaalyahano hubeysan oo ka tirsan Al-shabaab.
Dadka deegaanka Ceel-dheere ayaa ku warramay in xalay Al-shabaab ay gadaha usoo galeen deegaanka, iyaga oo wata gaadiidka nooca dagaalka, isla markaana halkaas uusan ka dhicin wax dagaal ah oo dhexmaray Ciidanka dowladda iyo Shabaabka.
Al-shabaab warar ay ku qoreen barahooda dhinaca Internet-ka ayaa waxaa ay ku sheegeen inay la wareegeen gacan ku heynta deegaanka lagu magacaabo Ceel-dheere oo u dhow Magaalada Dhuusamareeb, isla markaana ay ku sugan yihiin.
Sidoo kale Shabaabka ayaa tilmaamay in deegaanka markii horey ay isaga baxeen Ciidamo ka tirsan kuwa Maamulka Galmudug oo ku sugnaa, kadibna ay qabsadeen, iyadoo wax dagaalka uusan dhicin.
Ilaa iyo hadda ma jiro wax war ah oo kasoo baxay Saraakiisha Ciidanka dowladda qeybta 21-aad iyo Maamulka Galmudug oo ay uga hadlayaan wararka sheegaya in xalay Shabaab ay la wareegeen deegaanka Ceel-dheere.
Deegaanka Ceel-dheere ee Gobolka Galgaduud ayaa ku yaalla inta u dhexeeysa Magaalooyinka Guriceel iyo Dhuusamareeb, wuxuuna u dhow yahay Caasimadda dowlad Goboleedka Galmudug.
Ciidanka Xoogga dalka iyo kuwa Galmudug ayaa maalmihii lasoo dhaafay howlgal ka dhan ah Al-shabaab ka waday deegaano ka tirsan Gobolka Galgaduud, waxaana xusid mudan in dhinacyada ay dhexmareen dagaalo xoogan oo geystay khasaaro.