Askar Tiro Badan Oo Lagaga Dilay Ukraine Dagaalka Socda
Ku dhawaad 9,000 oo askari oo reer Ukraine ah, ayaa la dilay tan iyo markii uu bilowday duulaanka Ruushka, sida uu sheegay taliyaha guud ee ciidanka dowladda Ukraine, General Valeriy Zaluzhny.
Hadalka Zaluzhny, oo ay soo warisay wakaaladda wararka ee Interfax-Ukraine, ayaa bixinaysa qiyaasta tirada khasaaraha, tan iyo markii uu dagaalka billowday ku dhawaad lix bilood ka hor.
Bishii Juun, la taliyaha madaxweynaha ee dowladda Ukraine, Oleksiy Arestovych, ayaa sheegay in 10,000 oo askari ay dhinteen tan iyo bilowgii dagaalka.
Ruushka ayaan soo gudbinin tirada rasmiga ah ee dhimashadooda, tan iyo 25-kii bishii Maarso, markaasoo mas’uuliyiintu ay sheegeen in 1,351 askari iyo saraakiil inay dhinteen.