Shirkadda Apple Oo Taarikh Ka Dhigtay Gudaha Dalka Mareykanka Iyo Maxayse Tahay Taariikhdaasi
Shirkadda tiknolojiyadda ee dalka Mareykanka, Apple ayaa noqotay shirkaddii ugu horeysay ee gudaha Mareykanka qiimaha ay ku fadhido ee suuqyada saamiyada uu gaaro laba tiriliyan oo doollar.
Guushan ayay Apple gaartay laba sano un kadib markii ay noqotay shirkaddii ugu horeysay ee qiimaheedu uu gaaro hal tiriliyan oo doollar sanadkii 2018-ka, waxaana hadda qiimaha saamiga shirkadda uu gaaray 467.77 doollar.
Shirkadda kale ee qiimaheedu uu gaaray laba tiriliyan ayaa ah shirkadda saliidda ee dalka Sacuudiga ee Aramco.
Haseyeeshee qiimaha shirkadda Aramco ayaa hoos ugu dhacay oo waxaa uu haatan marayaa 1.8 tiriliyan halka Apple na ay sare u kacday.
Dhammaadka bishii July, waxaa ay noqotay shirkadda ugu qiimaha wanaagsan caalamka
Saamiga shirkaddan sameysay taleefoonada gacanta ee iPhone ayaa sare u kacay boqokiiba 50 inkastoo uu saameeyay xanuunka dunida ka dilaacay ee corona iyo cadaadis siyaasadeed oo ahaa in ay xirto bakhaarada ay ku leedahay dalka Shiinaha sababa la xiriira xiriirka kala dhaxeeya dowladda Shiinaha.
Walow horraantii sanadkan shirkado badan ay khasaareen, haddana Apple waxaa ay faaido wanaagasan ka sameyneysay alaabo ay sameysay oo ay kamid yihiin taleefoonada, kombyuutarada iyo qalabka kale ee tiknolojiyadda ee ay soo saarto.
Apple oo loo arko inay tahay shirkad guuleysatay ayaa xilligan waxaa sare u kacay dalabka adeegyada ay bixiso inkastoo wali dalka Mareykanka uu ku jiro soo kabasho dhaqaale.
Laga soo bilaabo bartamihii July, waxaa sare u kacay dakhliga soo galo shirkadda kadib markii ay dib usoo laabteen dalabka adeegyada ay bixiso.
Shirkadda kale ee laga leeyahay Mareykanka, Amazon ayaa noqotay tan labaad ee ugu qiimaha badan gudaha Mareykanka, waxaana qiimaheedu uu gaarayaa 1.7 tiriliyan oo doollar.
Paolo Pescatore oo ah khabiir wax ka qora arrimaha tiknolojiyadda ayaa sheegay in qiimaha saamiga ee Apple ay muddo gaaban ku gaartay meel aan la maleysan karin.
“Bilihii ugu dambeeyay waxaa la dareemay isticmaalka tiknolojiyadda, macaamiil bandanna waxaa ay doorbideen inay iibsadaan qalab tayo wanaagsan, maadama Apple ay tahayna shirkad dhankaas ku wanaagsan, waxaa muuqata inay leedahay fursad wanaagsan oo ay horumarto.” Ayuu yiri Paolo Pescatore.
Shirkadda oo saameyn ay ku yeelatay xiriirka aan wanaagsan ee Mareykanka iyo Shiinaha ayaa haatan laga dhowrsugayaa soo bandhigidda adeegga intarnetka ee 5G, taas oo la aaminsan yahay inay sii xoojin doonto dalabka shirkadda.