Hoggaamiyaha Kuuriyada Waqooyi oo sheegay in ay horumarinayaan soo saarida Hubka dalkaasi
Hoggaamiyaha Waqooyiga Kuuriya, Kim Jong Un, ayaa Jimcihii booqday saldhigga tababarka ee cutubyada hawlgalka gaarka ah ee ciidanka xoogga dalka ee loo yaqaan Korean People’s Army (KPA), sida ay ku warrantay wakaaladda wararka ee KCNA.
Warka ayaa sheegay in Kim uu fuulay goobta kormeerka si uu u daawado tababarka istiraatiijiyadeed ee guud iyo tartan toogasho oo ay ka qayb qaadanayeen ciidamo ka tirsan unugyada hawlgalka gaarka ah.
Tababarradaasi ayaa qeyb ka ahaa qorshaha joogtada ah ee kor loogu qaadayo tayada iyo diyaar-garowga ciidamada dalkaasi, sida lagu sheegay qoraalka ka soo baxay Wakaaladda Wararka dalkaasi.
Hogaamiyaha Kuuriyada Waqooyi ayaa tijaabiyay hub cusub oo ay sameeyeen, sida qoryaha goobaha fogfog wax ka toogan kara, isaga oo sheegay in ay sii horumarin doonaan nidaamka Difaaca dalkaasi.
Booqashada hoggaamiyaha ayaa imaneysa iyadoo Waqooyiga Kuuriya ay xoojineyso ololaha dhisidda awooda milatari ee dalka, xilli ay sii xoogeysanayaan xiisadaha ka taagan gobolka.