DEG DEG : Diyaaradda Ethiopian Airline Oo Ka Degtay Garoonka Hargeysa
Wararka aan ka heleyno Garoonka diyaaradaha Magaalada Hargeysa ee Cigaal International Airport ayaa sheegaya in Maanta halkaas ay degtay Diyaaradda Ethiopian Airline xili dowladda Soomaaliya joojisay duulimaadyadii Caalamiga ahaa ee dalka imaan jiray, si looga hortego Cudurka halista ee Coronavirus.
Diyaaradda Ethiopian Airline ayaa la sheegay inay kasoo duushay Magaalada Addis Ababa ayna kasoo degtay Garoonka Hargeysa, iyadoo maalintii Khamiistii ee la soo dhaafay ka baaqatay Safar ay ku tegi laheyd halkaas.
Warar la helayo ayaa sheegaya in Wasiirka Arrimaha dibadda Somaliland Yaasiin Xaaji Maxamuud Faratoon oo ku sugan Addis-Ababa uu gacan ka gaystay sidii Ethiopia Airline u sii wadan lahayd shaqadeeda Garoonka Hargeysa, in kastoo weli uusan soo bixin war ku aadan arrintaas.
Khamiistii ayay aheyd markii diyaaradda FlyDubai oo rakaab siday, kana soo duushay Magaalada Dubai ay dowladda Soomaaliya ka celisay hawada dalka xili ay dooneysay inay ka degto Hargeysa, isla markaana lagu amray inay dib ugu laabato dalkeeda.