Caruur Ku Geeriyootay Dab Ka Kacay Guri Ku Yaalla Burco
Faah faahino dheeraad ah ayaa kasoo baxaya Dab geystay Khasaaro isugu jira dhimasho iyo dhaawac iyo mid hantiyadeed oo xalay ka kacay Guri ku yaalla Magaalada Burco.
Dabkaan ayaa ka kacay Guriga ku yaallay xaafad lagu magacaabo Balaasa ee Magaalada Burco ee Gobolka Togdheer, waxaana Guriga kunoolaa qoys ay u joogeen Caruur yar yar.
Laba Caruur ah ayaa ku geeriyootay dabkaas, halka dhaawac uu soo gaaray Gabar shan sanno jir ah, waxaana halkaas markii dambe gaaray gaadiid dab demis ah oo demiyay dabka oo socday muddo dhowr daqiiqado ah.
Sidoo kale Guriga ayaa waxaa laga soo badbaadiyay Caruur kale iyo Wiilkood oo ku sugnaa Guriga xiliga uu dabka kacaayay, waxaana gurmad xoog leh u sameeyay dadka deegaanka xaafadda.
Ilaa iyo hada lama oga waxa sababay in dabkaas uu ka kaco Guri ku yaalla Xaafad ka tirsan Magaalada Burbo ee Gobolka Togdheer, mana jiro wax war ah oo kasoo baxay maamulka Burco ee Somaliland.