BURCO : Somaliland Oo Deeq Dadka Abaaraysan Loogu Gurmanayo Ku Wareejiyey Maamulka Gobolka Togdheer.
Madaxweyne-ku-xigeenka Somaliland, ahna guddoomiyaha guddida Gurmadka abaaraha heer qaran, Cabdiraxmaan Cabdilaahi Ismaaciil(Saylici) iyo wefti uu hoggaaminayo oo safar shaqo ku joogo gobollada bariga Somaliland, ayaa maamulka gobolka Togdheer ku wareejiyey deeq dhan 536 Lowr oo biyo ah, taas oo loogu talo galay dadka abaaruhu saameeyeen eek u dhaqan gobolka Togheer.
Madaxweyne-ku-xigeenka, oo shir ballaadhan la qaatay guddida gurmadka abaaraha ee gobolka Togdheer, ayaa warbixin la xiriirta heerka abaarta iyo tallaabooyinka xukuumaddu qaadday ka dhegaystay maamulka gobolka, waxana uu isla goobtaas ku wareejiyey deeq xukuumaddu ugu talo gashay inay kaga qaybqaadato gurmadka abaarta, taas oo gobolka Togdheer qaybtiisa maanta isla madashaas loogu wareejiyey.
Abaaro ba’an ayaa ku dhiftay degaanno ka tirsan Somaliland, waxaana meelaha qaar lasoo sheegayaa harraad iyo gaajo aad u daran, oo soo foodsaray dadka reer guuraaga ah, waxaana socda gurmad ka imaanaya Xukuumadda iyo hay’adaha gargaarka.