Duqeyn ay geysteen Militariga Israel oo sababtay dhimashada ugu yaraan 3 ruux oo rayid ah.
Militariga Israel ayaa ugu yaraan 10 weerar oo duqeyn ah ka geystay Daanta galbeed gaar ahaan Magaalada Jenin waxaana ka dhashay dhimashada ugu yaraan 3 ruux halka ay dhaawacmeen tiro intaas ka badan.
Saraakiisha Caafimaadka ee Falastiin ayaa sheegay in aroornimadii hore ee Isniinta Maanta dhowr gantaal ay ku dhaceen goobo kala duwan oo kamid ah Magaalada Jenin ee Daanta Galbeed inkasta oo uu khasaaraha intaas ka badan karo.
Dadka dhaawacmay ayaa qaarkood xaalad adag galay kaddib markii waxyeello daran kasoo gaartay firirka duqeynta ku dhacday goobaha ay joogeen, dhaqaatiirta kiiskooda gacanta ku heysa ayaa rejo ka muujiyay in ay la tacaalaan xaaladdooda.
Israel ayaa muddooyinkii dambe kordhisay duqeynta ay ka geysaneyso Daanta Galbeed iyada oo sheegtay in duqeyntaas inteeda badan ay ku beegsatay saraakiil katirsan Xamaas balse ururkaas ayaa waxba kama jiraan ka dhigay sheegashadaas.