Madaxweynaha Hirshabeelle oo hey’adaha amniga faray inay baaritaan dhab ku sameeyaan qaraxyadii ka dhacay Beledweyne.
Madaxweynaha dowlad goboleedka Hirshabeelle Cali Guudlaawe Xuseen ayaa aad u cambaareeyay qaraxyadii ka dhacay afaafka hore Madaxtooyada magaaalada Beledweyne oo ay ku geeriyoodeen Allaha u naxariistee Xilibaan Aamino Maxamed Cabdi, Xilibaan hore Cali Cabdi Dhuxul, Mas’uuliyiin iyo dad shacab ah.
“Madaxweynaha ayaa tilmaamay in cadowga argagixisada ah ay marwalba qorsheeyaan xasuuqa dadka waxgalka u ah bulshada lagama maarmaana ay tahay in meel looga soo wada jeesto” ayaa lagu yiri war qoraal ah ka soo baxay madaxtooyada Hirshabeelle.
Madaxweynaha ayaa u tacsiyeeyay ehellada iyo qaraabada dadkii ku nafwaayay weerarkii xalay, waxaana alle uga baryay in naxariistii janno uu ka waraabiyo, inta dhaawaca ahna waxa uu alle u waydiiyay caafimaad deg deg ah.
ugu dambeyn Madaxweynaha ayaa faray hay’addaha amniga in baaris deg deg ku sameeyaan falkii xalay ka dacay magaalada Beledweyne ee Gobolka Hiiraan.