DEG DEG : Alshabaab oo xaqiijiyay in ay Somaliland Ka la wareegeen deegaan ka tirsan gobolka Sanaag
Ururka Al-Shabaab ayaa markii ugu horeysay ka hadlay dagaalamayaal ka tirsan oo gaaray deegaan ka mid ah gobolka Sanaag.
Warbaahinta taageerta Al-Shabaab ayaa daabacday inay la wareegeen deegaanka Gacan-maroodi oo ka tirsan degmada Yubbe ee gobolka Sanaag.
Shabakada lagu magacaabo Shahaada ayaa daabacday in Axadii aynu ka soo gudubnay ay si rasmi ah ula wareegeen deegaanka Gacan-Maroodi oo qiyaastii 50KM u jirta magaalada Ceerigaabo ee xarunta gobolka Sanaag.
Sidoo kale waxaa bogga taageera Al-Shabaab ayaa lagu soo bandhigay sawirka dagaalamayaasha Al-shabaab oo gudaha u sii galaya deegaankaasi.
Ururka Al-Shabaab oo hore aan u joogin gobolada Waqooyi ee dalka Soomaaliya ayaa noqonaysa markii ugu horeysay ee ay ka gudbaan deegaanada Puntland oo ay saldhigyo ku leeyihiin.